Frustrations

This Blog is Dead

2006-10-06T23:42:00.000+08:00

At sinabi na ng paksa ang lahat. Hanapin nyo na lang ang bago ko.

ACM ICPC 2005

2005-11-02T18:22:00.000+08:00

http://curry.ateneo.net/asia_mnl_05/final.html

Nakakapanghinayang at muntik na makuha ng alin mang koponan ng UPD ang ikatlong karangalan para sa pinakamahusay na local team.

Ang aking koponan:

27 UP Wet University of the Philippines - Diliman Philippines 2

Sayang at hindi tama ang huli kong pinasa na sya sanang makapagbibigay sa amin ng lugar sa pinakamahusay na local team. Ang lalong nakakapanghinayang ay tama ang ginawa ko para sa mga sample input.

Ngunit tapos na kaya bawi na lang sa uulitin.

The Legend Of Zorro

2005-11-01T18:06:00.000+08:00

Pagkalipas ng mahabang panahon, ako ay muling nakapanood ng sine. Ang pelikula ay ang "The Legend of Zorro". Pansinin na sa pagpapahayag na kasapi na ang California sa USA ay kumpleto na ang bituin sa bandila ng USA. Kung totoo na ang mga bituin ay simbolo ng bawat estado, may maliit na pagkakamali ang pelikula sapagkat ang California ay ang ikatatlumpu't-isa. Samakatuwid, dapat ay tatlumpu't-isa lamang ang bituin sa bandila.

Perl: Acronym ba o hindi?

2005-10-27T17:22:00.000+08:00

Ayon sa http://www.philhosting.net/?menu=webhosting_faq,

What are PHP, ASP, perl, etc?
These are all programming languages which are referred to by their acronyms.

PHP - PHP: Hypertext Preprocessor
ASP - Active Server Pages
Perl - not an acronym

Each programming language has its own benefits and uses. It is best that you research on your own to find one that best fits your needs

Ngunit hindi ba ang ibig sabihin ng Perl ay Practical Extraction and Report Language?

Tama Na

2005-10-25T23:03:00.000+08:00

Hindi na kita kukulitin. Hindi na kita kakausapin. Tama na ang maramot at mapaniil na hangarin.

Na Naman

2005-10-24T17:01:00.000+08:00

Eto ako at muling susubukan buhayin ang blog. Nag-alis din ako ng ilang nakaraang posts sapagkat sa tingin ko ay hindi na sila kailangan.

Kathang-Isip

2005-06-21T23:47:00.000+08:00

Tayo ay magkaibigan.

Natuklasan natin na marami tayong pagkakatulad ngunit kitang-kita ang ating pagkakaiba. Sadyang hindi pantay ang antas na ating ginagalawan at kahangalan na ang pagsubok ko na pagtuntong sa antas mo. Ang pagnanais ko na lagi kang makausap ay kasakiman sapagkat ang kaligayahan ay nasa isang bahagi lamang ng pagsasama. Ang pagkakaintindi at pagkakadama mo ng aking mga nararanasan ay hindi nangangahulugan na parati kang naririyan at handang tumulong anumang oras. Dapat ipaunawa sa akin na kahit ikaw pa lamang ang pinakanakakaintindi sa akin ay wala kang gaanong panahon para marinig ang aking mga saloobin. Tuwiran itong salungat sa iyong kalagayan sapagkat maraming tenga ang handang pakinggan ang iyong mga problema. Gayunpaman, wala akong karapatan at dapat matutong makuntento kung ano ang mga dumarating sa akin.

Ayokong makipaglaro sa mga pusa. Mas masarap ang nasasaktan sa pamamagitan ng pagtatago ng mga problema sa sarili.

Kaarawan

2005-06-12T23:51:00.000+08:00

Maligayang kaarawan sa akin nitong nakaraang Hunyo 10. Maraming salamat sa lahat ng bumati.

Maraming maraming salamat sa iyo at naging tunay na maligaya ako sa aking kaarawan.

Slurpee

2005-05-31T19:50:00.000+08:00

Nitong mga nakaraang araw ay nabubuhay ako sa Slurpee. Ang Slurpee ng 7-Eleven na ang madalas kong bilhin ay ang medium na nagkakahalagang labing-apat na piso. Madalas na kasama ng Slurpee ay ang hotdog sandwich na spicy ang flavor.

Nung una, pineapple ang madalas kong bilhin na flavor. Lasa at kulay pa lang ay sigurado akong pineapple na iyon. Hindi ako maaaring magkamali. Nang lumaon, aking tinikman din ang isa pang flavor doon na mukhang laging nililinis ang lagayan ngunit cola naman pala.

Ang Slurpee ang naging bago kong kaibigan. Saksi sya sa kulo ng aking tiyan at sa init ng aking ulo. Gumuguhit sya sa aking lalamunan na nagbibigay ng kakaibang aliw sa aking katawan. Sagot sya sa aking mga pangangailangan. Hindi rin nya ako binibigyan ng brain-freeze.

At ngayon, muli akong nananabik sa muli naming pagkikita.

Panaginip

2005-05-17T19:31:00.000+08:00

Madalas akong managinip.

At sa mga panaginip na iyon, madalas ay ikaw ang paksa. Hindi ko nga alam na kung bakit sa dinami-rami ng taong pwedeng lumitaw sa panaginip ko e ikaw lagi ang naroroon. Aminin ko man na madalas kitang isipin, hindi ibig sabihin non na dapat mo ring pasyalan ang mga panaginip ko.

Sa dinami-rami ng mga panaginip na iyon, may isang katangi-tangi. Hindi ko lubos maintindihan kung bakit sa panaginip na pagpupulong ay naroroon ka. May binanggit kang dahilan subalit hindi ko na naintindihan pa. Ang tanging tumatak sa isipan ko e kasama ka na namin.

Nananaginip pa ba ako? Ewan pero parang hindi panaginip ang nangyaring iyon.